ஏழு கடல் தாண்டி, ஏழு மலை தாண்டி ஒருவன் தூங்கிக் கொண்டிருக்கிறான் என தொடங்கும் இந்த கதையில் நிவின் பாலி எட்டாயிரம் ஆண்டுகள் உயிர் துறக்காமல் சாகா வரம் பெற்று வாழ்பவனாக வந்திருக்கிறார். துபையில் வேலை செய்து வரும் நடிகர் சூரி எட்டு ஆண்டுகள் கழித்து தீபாவளிக்கு தனது குடும்பத்தையும் மகனையும் பார்ப்பதற்காக சொந்த ஊர் வருகிறார். அவசர அவசரமாக ரயில் பெட்டியை ஏற வரும் அவர் நிவின் பாலி உறங்கிக் கொண்டிருக்கும் கடைசி பெட்டியில் தஞ்சமடைகிறார். 8000 ஆண்டுகள் சாகாமல் வாழ்ந்து கொண்டிருக்கும் நிவின் பாலியும் 8 ஆண்டுகளுக்குப் பிறகு குடும்பத்தைக் காண வரும் சூரியும் அந்த ரயில் பெட்டியில் இரண்டரை மணி நேரம் பயணிக்கும் கதை ஏழு கடல் ஏழு மலை.
ரயில் பெட்டியில் சூரியால் கதவிடுக்கில் எலி ஒன்று மாட்டிக் கொள்கிறது. எலியின் கதறல் நிவின் பாலியை எட்டுகிறது. ஆள் அரவம் இல்லா அந்த ரயில் பெட்டியில் நிவின் பாலியின் தோற்றமும் நடவடிக்கைகளும் சூரியை அச்சுறுத்த, எப்படியாவது தப்பித்து விட முயற்சிக்கிறார் அவர். ஆனால் எலியின் உயிரை துச்சமாக மதிக்கும் சூரிக்கு உயிர் பயத்தை கொடுக்கிறார் நிவின் பாலி. நிவின் பாலியிடமிருந்து எப்படி தப்பித்தார் சூரி என்பதே மீதி கதை…
நிவின் பாலி, சூரி மற்றும் அஞ்சலி என அனைவரும் தங்களுடைய பங்களிப்பை சரியாக செய்துள்ளனர். இவர்களை தாண்டி அந்த எலியும் ஒரு கதாபாத்திரமாக மாறி நம்முடன் பயணிக்கிறது. ஒளிப்பதிவு படத்திற்கு மிகவும் பலம். கிராஃபிக்ஸ், AI பயன்படுத்தி செய்த காட்சிகள் இன்னும் நன்றாக இருந்திருக்கலாம் என தோன்றியது.
படத்திற்கு மிகப்பெரிய பலம் என்றால் அது பின்னணி இசையும் பாடல்களும் தான். படத்தின் ஆரம்பம் முதல் இறுதி வரை பாடல்கள் நம்மை தாலாட்டி அழைத்து செல்லும் விதம் நன்றாக இருந்தது. பல்லாயிரம் ஆண்டு காதலையும் தத்துவச் சிந்தனைகளையும் எளிமையான, அதேசமயம் ஆழமான தமிழ் வார்த்தைகளில் வடித்துள்ளனர் பாடலாசிரியர்கள் மதன் கார்க்கி, மதி புகழேந்தி. புதுமுகமாக அறிமுகமாகியுள்ள மதி புகழேந்தியின் வரிகள் மதன் கார்க்கியின் முதிர்ச்சியான சொல்லாட்சிக்கு ஈடுகொடுத்து, கவிதை நயத்துடன் காட்சி அமைப்புகளுக்கு உயிரூட்டி உள்ளன.
ஒவ்வொரு சட்டகத்தையும் ஒரு தூரிகை ஓவியம் போலக் கலைநயத்துடன் செதுக்கியுள்ளார் ஒளிப்பதிவாளர் என்.கே.ஏகாம்பரம் ரயிலின் குறுகிய இடத்தையும், இயற்கை எழில் கொஞ்சும் மலை மற்றும் நிலப்பரப்புகளையும் தனது கேமரா கோணங்களால் பிரம்மாண்டமாக காட்டி, ரசிகர்களுக்கு காட்சி விருந்து படைத்துள்ளார்.
மைனஸ்: திரைக்கதையில் கூடுதல் கவனம் தேவை…
ஏழு கடல் ஏழு மலை- எலியின் குமுறல்
