2017 ஆம் ஆண்டு இதே குஷ்பு, ஹிப் ஹாப் ஆதி கூட்டணியில் மீசையை முறுக்கு முதல் பாகம் வந்தது. ரசிகர்களிடையே நல்ல வரவேற்பையும் பெற்றது. இரண்டாம் பாகம் பென்ஸ் மீடியா பிரைவேட் லிமிடெட், அவ்னி மூவிஸ் சார்பில், குஷ்பூ சுந்தர் தயாரிப்பில், ஹிப் ஹாப் ஆதி இயக்கத்தில் நடிகர்கள் ஹிப் ஹாப் ஆதி, கெடிகா சர்மா, நாசர், ரம்யா ரங்கநாதன், யோகி பாபு , சைத்ரா ஆச்சார் , பாபா பாஸ்கர், கருணாஸ் மற்றும் பலர் நடிப்பில் வெளியாகியுள்ளது.
விமர்சனம்:
கானா பாடகரான ஹிப்ஹாப் ஆதி, கானா இசையை உலகளவில் கொண்டு செல்ல வேண்டும் என்ற கனவுடன் பயணிக்கிறார். பல்வேறு மேடைகளில் கானா பாடல்களை பாடி சாதிக்க அவர் மேற்கொள்ளும் முயற்சிகள் தோல்வியடைகின்றன. இதே கனவை அவரது மகனும் தொடர்ந்து, இசைத்துறையில் சாதிக்க முயற்சி செய்கிறார். ஆனால் அவரது முயற்சியும் எதிர்பார்த்த வெற்றியைத் தரவில்லை. இதையடுத்து மூன்றாவது தலைமுறையாக கானா இசையை உலகறியச் செய்யும் போராட்டத்தை ஹிப்ஹாப் ஆதி முன்னெடுக்கிறார். தனது தாத்தா மற்றும் தந்தையின் கனவை நிறைவேற்ற அவர் மேற்கொள்ளும் முயற்சியில் வெற்றி பெற்றாரா? கானா இசையை உலக அரங்கிற்கு கொண்டு சென்றாரா? என்பதே மீசைய முறுக்கு 2 கதை….
சென்னை கானா இசைக்காக ஆதி முன்னெடுக்கும் போராட்டங்களும், அதற்காக மேற்கொள்ளும் முயற்சிகளும் கவனம் பெறுகின்றன. குறிப்பாக வடசென்னை பின்னணியையும், அங்குள்ள இசைக் கலாசாரத்தையும் திரையில் கொண்டுவந்த விதம் ரசிகர்களை ஈர்க்கும் வகையில் அமைந்துள்ளது. ஆதி வழக்கமான பாணியில் தனது ‘அட்வைஸ்’ வசனங்களால் ரசிகர்களை ரசிக்க வைப்பதோடு, ஆட்டம், பாட்டம் என படம் முழுவதும் உற்சாகமான என்டர்டெயின்மென்ட்டை வழங்கியுள்ளார். மூன்று தலைமுறை கானாபாடகராகவும் ஹிப்ஹாப்தமிழா ஆதியே நடித்திருக்கிறார்.அந்தந்தக் காலகட்டத்துக்கேற்ற உடைகள்,சிகையலங்காரம் ஆகியன மட்டுமின்றி உடல்மொழியிலும் வேறுபாடு காட்டியிருக்கிறார்.
சைத்ரா,கீதிகா சர்மா,ரம்யா ரங்கநாதன் ஆகிய மூன்று நாயகிகள் படத்தில் இருக்கிறார்கள். ஒவ்வொருவரும் ஒவ்வொருவிதம்… ரம்யா ரங்கநாதன் கொஞ்சம் முன்னிலை பெறுகிறார். கருணாஸ், ஹர்சத் கான் ஆகியோர் நல்லநடிப்புடன் நகைச்சுவையையும் கலந்து கொடுத்து சிரிக்க வைக்க முயற்சி செய்கிறார். நாசர், ஆடுகளம் நரேன், சாரா, கருணாகரன் என படத்தில் முக்கியமான நடிகர்கள் இருக்கிறார்கள்.
அவர்களுடைய அனுபவ நடிப்புகள் படத்துக்குப் பலமாக அமைந்திருக்கிறது. ஹிப்ஹாப் ஆதியின் இசை படத்தின் முக்கிய பலமாக அமைந்துள்ளது. பாடல்கள் ரசிகர்களை ஆட்டம் போட வைக்கும் வகையில் உள்ளன. குறிப்பாக ‘ஆரா பத்துக்கு பத்து…’ பாடல் கொண்டாட்டத்தின் உச்சமாக அமைந்துள்ளது. கானா இசை, இளைஞர்களுக்கான கருத்துகள், பாடல், நடனம் மற்றும் கொண்டாட்டம் என பொழுதுபோக்கு அம்சங்களை கலந்து உருவாக்கப்பட்டுள்ள ‘மீசைய முறுக்கு 2’, ஹிப்ஹாப் ஆதி ரசிகர்களுக்கு உற்சாகமான விருந்தாக அமைந்துள்ளது.
மைனஸ்: காமெடியில் கூடுதல் கவனம் செலுத்தியிருக்கலாம், முதல் பாதி கதையை இன்னும் ஜாலியாக கொண்டுபோயிருக்கலாம், கதையை இன்னும் தெளிவாக சொல்லியிருக்கலாம்.
மீசைய முறுக்கு 2 – கானா வெறி ஆட்டம்.
