கண்மணி ரங்கநாதன் மற்றும் வெங்கல் லிங்கேஸ்வரன் தயாரிப்பில், தண்டர் மீடியா மற்றும் எல் வி என்டர்டைன்மெண்ட் சார்பில் குரு சோமசுந்தரம், அனு மோள், நயனா சாய், சாய் விக்கி, விஜய் விஷ்வா அர்ச்சனா நடிப்பில் சரஜ் சீலன் எழுதி இயக்கி இருக்கும் படம் தான் ‘பாரிஸ் கஃபே’

விமர்சனம்

மருத்துவரான குரு சோமசுந்தரம் மனைவி அனுமோல் மீது பெரும்பாசம் கொண்டவர். சமூகநலனுக்காக குரல் கொடுக்கும் அனுமோலும் கணவன் மீது பாசம் கொண்டவர் தான். குரு சோமசுந்தரம் சூழ்நிலை அழுத்தம் காரணமாக ஒரு காதல் ஜோடியின் கொலையை தற்கொலை என போஸ்ட்மார்ட்டம் ரிப்போர்ட் கொடுத்து விடுகிறார்.

அதில் கோபப்படும் அனுமோல் கணவரை விட்டுப் பிரிகிறார். இவர்களைச் சேர்த்து வைப்பதற்காக மகள் அர்ச்சனா அவரின் காதலன் விஜய் விஷ்வா இருவரும் வருகிறார்கள். பெரிய ஜோடியை சின்ன ஜோடி சேர்த்து வைத்ததா? அந்த போஸ்ட் மார்ட்டம் ரிப்போர்ட் ரீ ஓப்பன் ஆகி என்ன விளைவுகளை ஏற்படுத்தியது? என்பதே படத்தின் கதை.

குருசோமசுந்தரம் குற்றவுணர்ச்சியை சுமக்கும் காட்சிகளில் சிறப்பாக நடித்துள்ளார். அனுமோல் பெரியார் அம்பேத்கர் வழிமொழிந்த பெண்ணாக நடித்து கவனம் ஈர்க்கிறார். விஜய் விஷ்வா ஒரு சப்போர்ட்டிங் ஹீரோவாக அசத்துகிறார். அர்ச்சனா கொடுத்த வேலையைச் சிறப்பாகச் செய்துள்ளார்.

கொலை செய்யப்பட்ட ஒரு காதல் ஜோடி இயல்பாக நடித்துள்ளனர். இயக்குநர் சராஜ் சீலன் ஒரு சோசியல் கன்டென்ட்-ஐ கையிலெடுத்துள்ளார். அந்தக் கன்டென்டில் கொஞ்சம் கமர்சியல் சேர்த்து ஓரளவு இன்ட்ரெஸ்டிங்காகவே கதை நகர்கிறது. படம் முழுக்க ஆங்காங்கே காமெடிகள் வைத்து முக்கிய திருப்பத்துக்குள் கதை போனதும் எமோஷனலாக சீரியசாக முடிய வேண்டிய படம் இது. மாறாக, கடைசி நேரத்தில் வில்லனை எல்லாம் காமெடி ஆக்கி குரு சோமசுந்தரம் கையில் துப்பாக்கி கொடுத்து காமெடி செய்து படத்தை சற்று நீர்த்துப் போகச் செய்து விட்டார்கள். கிளைமேக்ஸ் ரசிக்க வைக்கிறது.

பாரிஸ் கஃபே- ஜோடியின் கருத்து.

வேலை தேடி அலையும் நான்கு இளைஞர்களுக்கு ஒரு தனியார் நிறுவனத்தில் மார்க்கெட்டிங் எக்ஸிகியூட்டிவ் வேலை கிடைக்கிறது. வேலை கிடைத்த சந்தோஷத்தைவிட, வேலையைச் செய்யாமல் எப்படி சமாளிப்பது என்பதில்தான் அவர்களுக்கு அதிக ஆர்வம். நிறுவனத்தின் இலக்குகளைப் பற்றி பெரிதாகக் கவலைப்படாமல், தங்களுக்குத் தெரிந்த விதத்தில் பொழுதைக் கழிக்கும் இந்த நால்வருக்கும் ஒரு கட்டத்தில் பிரச்சினை காத்திருக்கிறது.

கொடுக்கப்பட்ட இலக்கை குறிப்பிட்ட காலத்திற்குள் முடிக்க வேண்டும் இல்லையென்றால் வேலையை இழக்க நேரிடும் என்ற நெருக்கடி உருவாகிறது. இதற்கிடையில் ஒரு பிரபல நிறுவனத்தைச் சேர்ந்த குடும்பத்துடன் தொடர்புடைய ஒரு சிறுவன் கடத்தப்படுவது கதையின் போக்கையே மாற்றுகிறது. அந்தக் கடத்தல் வழக்கின் நிழல் இந்த நான்கு இளைஞர்களின் மீதும் விழ, அதிலிருந்து அவர்கள் எப்படி தப்பிக்கிறார்கள் என்பதே படத்தின் கதை. 

சித்து மூலிமணி, சந்தோஷ், ஸ்ரீ வைஷ்ணவ், கிருஷ்ணா விஜய், பாலாஜி, ஸ்ரீகாந்த், அமிதா ரங்கநாதா, நிஷா ஹெக்டே, மேரி லிட்டி & கீர்த்தனா புல்கி தனக்கு கொடுத்த வேலையை செய்திருக்கிறார்கள். குறிப்பாக, சூழ்நிலையைப் புரிந்துகொள்ள முடியாமல் தவிக்கும் தருணங்களிலும், பிரச்சினையிலிருந்து தப்பிக்க முயலும் காட்சிகளிலும் இயல்பான நடிப்பு படத்திற்கு நகைச்சுவைத் தன்மையைச் சேர்க்கிறது. வேலை மீது அக்கறையில்லாமல் இருக்கும் இளைஞர்கள் தங்களால் சமாளிக்க முடியாத ஒரு பெரிய பிரச்சினைக்குள் சிக்கிக்கொள்ளும்போது ஏற்படும் குழப்பங்களே படத்தின் பிரதான பொழுதுபோக்கு.

படத்தின் மிக முக்கியமான பலம் அதன் பெங்களூரு களம். நகரத்தின் இயல்பான சூழலைப் பயன்படுத்தி கதை நகர்த்தப்பட்டிருப்பது படத்திற்கு தனித்துவமான தோற்றத்தைத் தருகிறது. குறிப்பாக, பெங்களூருவின் பன்மொழிச் சூழலைப் பிரதிபலிக்கும் வகையில் வெவ்வேறு மொழிப் பின்னணியைக் கொண்ட கதாபாத்திரங்களை உருவாக்கியிருப்பது ரசிக்க வைக்கிறது. இயக்குநர் தம்பிதுரை எத்துராஜ், கதையை நேரடியாகச் சொல்லாமல் கடந்த காலத்தையும் நிகழ்காலத்தையும் இணைத்து திரைக்கதையை நகர்த்தியிருக்கிறார்.

கோல்ட் கால்- டார்கெட் வலி. 

பாலாஜி இயக்கத்தில் பிக்பாஸ் புகழ் நட்சத்திரங்கள் சித்து, தர்ஷிகா, ரித்விகா ஆகியோருடன், வேல ராமமூர்த்தி, நிழல்கள் ரவி, ஜெயக்குமார், அருள் டி சங்கர், சத்தியா, சாப்ளின் பாலு, கோபால் மற்றும் பலர் நடித்துள்ள படம் தான் ‘தி டார்க் ஹீவன்’

விமர்சனம்

திருநெல்வேலி மாவட்டத்தில் உள்ள மெக்கரை என்ற மலைக்கிராமத்தை மையமாக வைத்து கதை நகர்கிறது. பல நூறு ஆண்டுகளுக்கு முன்பு நடைபெற்றதாக கூறப்படும் சில மர்மமான சம்பவங்கள், நிகழ்காலத்திலும் எவ்வாறு தொடர்கின்றன என்பதுதான் படத்தின் கதைக்களத்தின் முக்கிய அடித்தளம்.

மெக்கரையில் உள்ள கலை மற்றும் கைவினைப் பொருட்கள் விற்பனை செய்யும் கடையில் ஒரு மர்மமான புத்தகம் கிடைக்கிறது. அந்தப் புத்தகத்தின் சிறப்பு என்னவென்றால், அதை யார் படிக்கத் தொடங்கினாலும், அவர்களின் வாழ்க்கையில் அடுத்து நடைபெறவிருக்கும் சம்பவங்கள் அதில் ஏற்கனவே எழுதப்பட்டிருக்கின்றன. அதுமட்டுமல்லாமல், அந்த நபர் எப்போது, யாரால், எவ்வாறு இறக்கப் போகிறார் என்பதும் அந்தப் புத்தகத்தில் குறிப்பிடப்பட்டிருப்பது கதைக்கு மேலும் பரபரப்பை ஏற்படுத்துகிறது.

இந்த மர்மமான புத்தகத்தைச் சுற்றி பல ஆண்டுகளுக்கு முன்பு நடைபெற்ற சம்பவங்களுக்கும், நிகழ்காலத்தில் நடைபெறும் தொடர் மரணங்களுக்கும் உள்ள தொடர்பு என்ன என்பதே கதையின் முக்கிய முடிச்சாக அமைந்திருக்கிறது. 25 ஆண்டுகளுக்குப் பிறகு, அந்த நூலகரின் மகள் தனது தந்தைக்கு என்ன நடந்தது என்பதை அறிந்து கொள்வதற்காக மெக்கரைக்கு வருகிறார். அதே நேரத்தில், கிராமத்தில் மர்மமான முறையில் தொடர்ந்து நடைபெறும் தொடர் மரணங்களை விசாரிப்பதற்காக காவல்துறை அதிகாரியாக சித்து அங்கு வருகிறார்.

கிராம மக்கள் இந்த தொடர் மரணங்களுக்கு பின்னால் வன தெய்வத்தின் சாபம் இருப்பதாக நம்புகின்றனர். ஆனால் காவல்துறை அதிகாரியான சித்து, இதை இயற்கைக்கு அப்பாற்பட்ட சம்பவமாக பார்க்காமல், இதன் பின்னால் ஒரு சைக்கோ கொலையாளி இருக்கிறாரா என்ற கோணத்தில் விசாரணையைத் தொடங்குகிறார். இந்தக் கொலைகளின் பின்னணியில் இருப்பது யார்? என்பதே கதை.

சித்து, காவல்துறை அதிகாரி கதாபாத்திரத்தில் இயல்பான நடிப்பை வழங்கியிருக்கிறார். தர்ஷிகா, ரித்விகா ஆகியோருக்கும் கதையோட்டத்திற்கு தேவையான முக்கியத்துவம் கொண்ட கதாபாத்திரங்கள் வழங்கப்பட்டுள்ளன. இருவரும் தங்களுக்குக் கிடைத்த வாய்ப்பை சிறப்பாக பயன்படுத்தியுள்ளனர்.

நிழல்கள் ரவி, வேல ராமமூர்த்தி, அருள் D சங்கர் உள்ளிட்ட நடிகர்கள் ஏற்றுள்ள கதாபாத்திரங்கள் பார்வையாளர்களிடையே சந்தேகத்தை ஏற்படுத்தும் வகையில் வடிவமைக்கப்பட்டுள்ளன. இதுவே படத்தின் மர்மத்தன்மையை மேலும் வலுப்படுத்துகிறது. கதாபாத்திரத்தின் தீவிரத்தையும், விசாரணைக் காட்சிகளின் அழுத்தத்தையும் உணர்ந்து நடித்திருப்பது பாராட்டுக்குரியது. குறிப்பாக, கதையின் மர்மம் அதிகரிக்கும் நேரங்களில் அவரது நடிப்பு படத்தின் பதற்றத்தை அதிகரிக்க உதவுகிறது.

தி டார்க் ஹீவன்- த்ரில் கலவை.

ஆர்.எஸ். இன்ஃபோடைன்மென்ட் தயாரிப்பில், இயக்குநர் மதிமாறன் புகழேந்தி இயக்கத்தில், சூரி, மஹிமா நம்பியார், சத்யராஜ், சுஹாஸ், மிதுன் ஜெய்சங்கர் மற்றும் பலர் நடிப்பில் வெளியாகியுள்ள படம் ‘மண்டாடி’

மீனவ சமூகத்தின் வாழ்க்கை, கடல், பாரம்பரிய படகுப் பந்தயம் மற்றும் தனிப்பட்ட பகை ஆகியவற்றை மையமாக வைத்து இப்படத்தின் கதை உருவாக்கப்பட்டுள்ளது. இதில் முத்துக்காளி என்ற கதாபாத்திரத்தில் சூரி நடித்துள்ளார். கடலில் மீன்பிடிப்பதில் திறமை வாய்ந்தவராக மட்டுமல்லாமல், படகுப் பந்தயத்திலும் தனக்கென ஒரு பெயரை உருவாக்கியவராக முத்துக்காளி காட்டப்படுகிறார். சில தனிப்பட்ட காரணங்களால் தனது சொந்த ஊரை விட்டு விலகியிருக்கும் அவர், மீண்டும் தனது மக்களுக்காக திரும்பி வர வேண்டிய சூழ்நிலை ஏற்படுகிறது. அப்போது நீண்ட காலமாக அவருடன் மோதலில் இருக்கும் சட்டைப் புலி என்ற கதாபாத்திரம் அவருக்கு மிகப்பெரிய சவாலாக மாறுகிறது. அதை சூரி எப்படி கையாண்டார் என்பதே கதை.

முத்துக்காளி கதாபாத்திரத்திற்காக நடிகர் சூரி தன் உடலமைப்பை முழுமையாக மாற்றி, மீனவ மக்களின் மொழிநடையை உள்வாங்கி அப்படியே வாழ்ந்திருக்கிறார். சூரி மற்றும் சுஹாஸ் இடையிலான சண்டைகாட்சி, உணர்வுப்பூர்வமான ஃப்ளாஷ்பேக் மற்றும் ஜி.வி-யின் பின்னணி இசை ஆகியவை வேற லெவல். கடலில் படகில் நடக்கும் சண்டைக் காட்சிகள் ரசிக்க வைக்கின்றன. படத்தின் மிகச்சிறந்த பகுதிகள் க்ளைமாக்ஸ் காட்சியில் தான் வருகிறது.

சற்று நீளமான ஃப்ளாஷ்பேக் காட்சிக்குப் பிறகு, திரைக்கதை மீண்டும் வேகம் பிடிக்கிறது. குறிப்பாக, பிரம்மாண்டமான படகுப் பந்தயக் காட்சியுடன் அமையும் க்ளைமாக்ஸ், கண்டிப்பாகப் பெரிய திரையில் அனுபவிக்கப்பட வேண்டிய ஒன்று. படம் முழுவதும் சூரி மிகச்சிறப்பான நடிப்பை வெளிப்படுத்தி படத்தை உறுதியுடன் தாங்கிப் பிடிக்கிறார்.

முதல் பாதி முழுவதும் கொஞ்சம் போர் அடிக்கிறது. ஆனால், இரண்டாம் பாதி படத்தை ஓரளவுக்குக் காப்பாற்றுகிறது. காளி தன் கடந்த காலத்தைச் சொல்லும் காட்சிகள், புலியுடனான நட்பு, சத்யராஜ் கதாபாத்திரம் ஆகியவை நன்றாக வொர்க்-அவுட் ஆகியுள்ளது. மஹிமா உடனான காதல் காட்சிகள் சுவாரஸ்யமாக உள்ளன. க்ளைமாக்ஸில் வரும் படகுப் போட்டி காட்சிகள் விறுவிறுப்பாகவும், எமோஷனலாகவும் எடுக்கப்பட்டுள்ளன. படத்திற்கு இரண்டாம் பாதியும், படகுப் போட்டிகளும்தான் முக்கிய பலம்.

மொத்தத்தில் இந்த ‘மண்டாடி’ படகு மன்னன்