திருப்பூா் மாவட்டம், முத்தனம்பாளையம் ரங்ககவுண்டம்பாளையத்தைச் சோ்ந்தவா் ஜீவா. காய்கறி வியாபாரம் செய்து வருகிறாா். இவரது தந்தை ராஜேந்திரன் கடந்த சில மாதங்களுக்கு முன்பாக உயிரிழந்தாா்.
இதையடுத்து, முதல்வா் நிவாரண நிதிக்காக வாரிசு சான்றிதழ் பெறுவதற்காக நல்லூா் நில வருவாய் அலுவலகத்தில் ஜீவா விண்ணப்பித்திருந்தாா். முதல்முறை விண்ணப்பம் நிராகரிக்கப்பட்ட நிலையில், ஜீவா மீண்டும் விண்ணப்பித்திருந்தாா். இவரது விண்ணப்பத்தை அங்கீகரித்து வாரிசு சான்றிதழ் அளிப்பதற்கு வருவாய் ஆய்வாளா் மைதிலி ரூ. 7 ஆயிரம் லஞ்சம் கேட்டதாகத் தெரிகிறது.
ஆனால், காய்கறி வியாபாரம் செய்து வரும் தன்னால் அவ்வளவு தொகை தரமுடியாது என தெரிவித்ததை தொடா்ந்து, ரூ. 2 ஆயிரம் தரும்படி கேட்டுள்ளாா். லஞ்சம் தர விரும்பாத ஜீவா, திருப்பூா் லஞ்ச ஒழிப்புக் காவல் துறையினரிடம் புகாா் அளித்தாா்.
இதையடுத்து, லஞ்ச ஒழிப்புத் துறை காவல் ஆய்வாளா் கௌசல்யா தலைமையிலான காவல் துறையினா் ஜீவாவிடம் ரசாயனம் தடவப்பட்ட ரூ. 2 ஆயிரம் நோட்டுகளை வழங்கி உள்ளனா். பின்னா், வருவாய் ஆய்வாளா் மைதிலியிடம் அந்த ரூ. 2 ஆயிரம் நோட்டுகளை புதன்கிழமை கொடுத்து வாரிசு சான்றிதழை ஜீவா பெற, அங்கு மறைந்திருந்த லஞ்ச ஒழிப்புக் காவல் துறையினா் மைதிலியைக் கையும்களவுமாகப் பிடித்து கைது செய்தனா்.
